१३ वर्षपछि पाकिस्तान विश्वकप फाइनलमा पुगेपछि यस्तो भन्छन् बाबर

काठमाडौं ।

टी–२० विश्वकपको सुरुवात खराब भए पनि पाकिस्तानले भाग्यको साथ पाउँदा फाइनलको यात्रा तय गरिसकेको छ । बुधबार सेमिफाइनलमा न्यूजिल्याण्डलाई ७ विकेटले हराउँदै पाकिस्तानले फाइनलको यात्रा तय गरेको हो । यो जितपछि पाकिस्तानी कप्तान बाबर आजम निकै खुसी हुँदै यस्तो प्रतिक्रिया दिएका छन् ।

‘हामीले घरेलु मैदानमै खेलिरहेको सोचिरहेका थियौं । पहिलो ६ ओभरमा राम्रो सुरुवात भयो । पछि राम्रो हुन सकेन । तीव्र गतिका बलरहरुले राम्रो प्रदर्शन गरे । हामीले मैदानमा जानुअघि पावरप्लेमा कसरी खेल्ने भन्ने योजना बनाएका थियौं । हरिस जवान छन् । र, उनले आफ्नो आक्रामकता देखाउँछन् । उनी निकै राम्रो खेलिरहेका छन् । अहिले यो क्षणको मजा लिन जाँदैछौं । तर, हामी फाइनलमा ध्यान केन्द्रित गर्नेछौं,’ बाबरले खेल सकिएपछि भने ।

सेमिफाइनलमा न्यूजिल्याण्डले दिएको १ सय ५३ रनको लक्ष्य पाकिस्तानले १९.१ ओभरमा तीन विकेट गुमाएर भेट्टायो ।उसका लागि कप्तान बाबर आजम र उपकप्तान मोहम्मद रिजवानलले अर्धशतकीय पारी खेले । ४३ बलको सामना गरेका रिजवानले पाँच चौकाको सहयोगमा ५७ रन बनाए । त्यस्तै, बाबरले ४२ बलमा सात चौकाको मद्दतमा ५३ रनको योगदान दिए ।

त्यस्तै, मोहम्मद हरिसले २६ बलमा दुई चौका र एक छक्कासहित ३० रन जोडे । शन मसूद तीन रनमा अविजित रहे । न्यूजिल्याण्डका लागि टे«न्ट बोल्टले दुई र मिचेल सान्टनरले एक विकेट लिए । त्यसअघि सिड्नी क्रिकेट ग्राउन्डमा टस जितेर ब्याटिङ रोजेको न्यूजिल्याण्डले निर्धारित २० ओभरमा ४ विकेट गुमाएर १ सय ५२ रन बनायो । उसका लागि अलराउन्डर डारियल मिचेलले अर्धशतकीय पारी खेले ।

३५ बलको सामना गरेका उनले तीन चौका र एक छक्कासहित अविजित ५३ रन बनाए । त्यस्तै, कप्तान केन विलियम्सनले ४२ बलमा एक चौका र एक छक्काको सहयोगमा ४६ रनको योगदान दिए । डेभन कन्वे २१, ग्लेन फिल्पिस ६ र फिन एलन चार रनमा आउट भए । जेम्स नीशम १६ रनमा अविजित रहे । पाकिस्तानका लागि शाहिन साह अफ्रिदीले उत्कृष्ट बलिङ गरे ।

चार ओभरमा २४ रन मात्र दिएका उनले महत्वपूर्ण दुई विकेट लिए । त्यस्तै, मोहम्मद नवाजले एक विकेट लिए । पाकिस्तानलाई एक विकेट रनआउटको रूपमा प्राप्त भयो । पाकिस्तानले अब फाइनलमा दोस्रो सेमिफाइनलको विजेताको सामना गर्नेछ । दोस्रो सेमिफाइनलमा बिहीबार भारत र इंग्ल्याण्ड प्रतिस्पर्धा गर्दैछन् ।

Leave A Reply

Your email address will not be published.