पञ्जाबमा जोडिए आरसिबीका पूर्वखेलाडी

काठमाडौं ।

रोयल च्यालेन्जर्स बैंग्लोर (आरसिबी) बाट आइपिएल खेलिसकेका भारतीय पूर्वखेलाडी सुनिल जोशी पञ्जाब किंग्समा जोडिएका छन् । उनी आगामी सिजनको आइपिएलका लागि स्पिन बलिङ प्रशिक्षकको रूपमा पञ्जाबको टिममा जोडिएका हुन् । उनले २०१९ मा पनि टोलीका लागि यो जिम्मेवारी निर्वाह गरेका थिए ।

सन् २०२० मा भारतीय छनोट समितिमा आएपछि सुनिलले सो जिम्मेवारी त्यागेका थिए । २०२० मा सुनिल भारतीय टिमको चयनकर्ताको अध्यक्ष बनेका थिए । उनीपछि चेतन शर्माले चयनकर्ताको अध्यक्षको विम्मेवारी पाएका थिए । जोशी २०२२ पुरुष टी–२० विश्वकपपछिसम्म समितिको सदस्य भने कायमै रहने छन् ।

उनले सन् १९९६ देखि २००१ सम्म भारतका लागि १५ टेस्ट र ६९ ओडिआई खेलेका थिए । जसमा उनले कुल ११० विकेट लिए । बायाँ हाते यी स्पिनरले सन् २०१२ मा सबै प्रकारका खेलबाट संन्यासको घोषणा गरेका थिए । जोशी सन् २००८ मा आइपिएलको पहिलो सिजनमा रोयल च्यालेन्जर्स बैंग्लोरको टोलीमा थिए ।

पञ्जाब किंग्सले सामाजिक सञ्जालमार्फत स्पिन बलिङ प्रशिक्षक नियुक्त गरेको जानकारी दिँदै लेखेको छ, ‘हामी यो घोषणा गर्न पाउँदा उत्साहित छौँ । पूर्व भारतीय बायाँ हाते स्पिनर सुनील जोशी पञ्जाब किंग्स स्पिन बलिङ प्रशिक्षक नियुक्त भएका छन् । उहाँलाई टिममा न्यानो स्वगात गर्दछौँ ।’ हालसम्म पञ्जाबले आइपिएल उपाधि जित्न सकेको छैन । आसन्न संस्करणको आइपिएल सिजन मार्चदेखि सुरु हुँदैछ ।

Leave A Reply

Your email address will not be published.